RCLM-Baucau (12-11-2025)—Autoridade Munisípal Baucau (AMB), husu deskulpa ba públiku ligadu publikasaun aniversáriu komemorasaun Masakre Santa Kruz iha pájina ofisiál Prezidente Autoridade Munisipiu ne’ebé tinan sala.
Masakre Santa Kruz-Díli akontese iha loron 12 novembru tinan 1991, Estadu no Governu inklui Timoroan kada tinan selebra nia aniversáriu no tinan ida ne’e (2025) selebra ba dala-34, maibé iha publikasaun hosi pájina ofisiál Prezidente Autoridade Munisipiu hakerek tinan sala tamba tau fali tinan 1992.
Hafoin remata misa agradesementu komemorasaun loron Masakre Santa Kruz no loron nasionál juventude iha Igreja Katedral Dioseze Baucau, Prezidente Autoridade Munisipiu Baucau Veneranda Eurico Lemos Martins husu deskulpa ba públiku liu-liu leitores, tamba Autoridade hakerek tinan akontesementu masakre Santa Kruz ne’ebé sala no públika iha pájina ofisiál Autoridade Munisipiu Baucau iha loron 11 novembru.
“Aproveita iha ne’e hau hakarak husu deskulpa ba lee nain sira asesu ba pájina Munisípiu ninian, katak horesik ami dezeña tiha liafuan balun ami hakerek sala em vezde ami tau 12 novembru 1991, ami hakerek sala tiha númeru 2 (1992), mais ida ne’e lasu ida lases husi ami nia matan maibe hau hare ema barak halo komentáriu tarata ha’u laiha buat ida,” PAM Baucau rekoiñese.
Lideransa Autoridade Munisípál Baucau dehan, prontu simu krítika sira husi públiku kona-ba fallansu ne’e maibé ho ideias konstruitivu no nafatin hamutuk ho autoridade, hodi lori benisfisiu di’ak ba Munisípiu Baucau.
“Tamba númeru oan ne’e tarata at los Autoridade Munisipiu mais ne’e la iha buat ida hodi ita boot sira nia ko’alia ami bele hadia di’ak liu tan, ho kritika ita ba bei-beik tamba hamutuk ho ita boot sira ami fi’ar katak ita sei halo buat ruma ba Baucau hodi kontinua mehi erois no eroinas sira nian liu-liu juventude loriku asuwa’in ne’ebé brani. Tamba ne’e hau mos husu ba lé nain sira ba folowers pájina Munisípiu Baucau ninian atu posting buat ruma di’ak karik komentáriu buat di’ak hela ba ema hotu halo labele kritika de’it maibe fó motivasaun atu ema kontinua servisu ba oin,”nia fó hanoin.
Entertantu iha biban ne’e, Prezidente Autoridade Munisipiu Baucau agradese no parabeniza ba komisaun organizadór loron Masakre Santa Kruz no loron nasionál juventude tamba involvle juventude de’it hodi organiza atividade la’os de’it iha Postu Administrativu Baucau vila, maibé iha Postu Administrativu hitu seluk hanesan Baguia, Laga, Matebian, Quelicai Antigu, Quelicai, Venilale no Vemasse.
“Ita fó parabens ba komisaun organizadór joven de’it matenek teb-tebes hodi bele organiza desde horeseik no ohin la’ós de’it iha munisipiu Baucau vila, maibe iha postu hotu-hotu,” tenik Prezidente Autoridade Baucau.
Enkuantu komemorasaun 12 novembru masakre Santa Kruz ba dala-34 no loron nasionál juventude ba dala -20 iha Postu Administrativu Baucau vila hetan partisipasaun másimu husi Autoridade sivil no seguransa, durante misa agradesementu to’o remata.
Hafoin ne’e kontinua la’o ain hodi lilin no ai-funana ba semiteriu públiku Tirilolo hodi kari ai-funan no sunu lilin iha kruz boot, hodi fó onra ba matiries ne’ebé mate iha funu laran to’o Nasaun Timor-Leste sai independente, atividade seluk ne’ebé hala’o iha Postu Administrativu Baucau vila mak semináriu, kalan refleksaun no ensera ho animasaun ka konsertu múzika.
Ekipa Kobertura : RCLM
