RCLM-Baucau (10-11-2025)—Ministeriu Komersiu no Indústria (MKI) liu husi Diresaun Nasionál Komérsiu Internu, realiza bazar baratu iha Postu Administrativu Laga Munisípiu Baucau, hodi komemora loron Nasionál Juventude bá dala-20 no akontesementu Masakre Santa Kruz bá dala-34 tinan ne’e.
Kordenador Gabinete Apoiu Juridiku MKI Gregorio da Silva esplika, objetivu bazar baratu ne’e bazéia bá proposta husi Autoridade Postu Administrativu Laga hodi komemora loron Nasionál Juventude Loriku Asuwain, ne’ebé uluk luta ba Indepedensia no parte seluk responde preokupasaun komunidade nia kona-bá folin nesesidade báziku tamba folin a’as.
“Husi bazar baratu ne’e realiza tamba pedidu husi Administradór Postu Laga hodi responde no komemora 12 novembru tamba tinan 20 resin ba kotuk juventude loriku asuwain oferese sira nia vida no simu sofrementu, hodi hanaruk no hamoris ita nia luta iha komunidade internasionál tamba ne’e mai loke (bazar baratu) responde ba nesesidade báziku komunidade Laga nian,”dehan Gregorio iha Resintu Administrasaun Postu Administrativu Laga sesta (07-11-2025).
Administrador Postu Administrativu Laga João Freitas de Castro agradese no fó apresiasaun ba Ministeriu Komérsiu Industria, tamba resposta pedidu hodi hala’o bazar baratu durante loron lima (5) iha Postu Administrativu Laga hodi komemora loron Nasionál Juventude.
“Aktividade ida-ne’e realiza durante loron lima (5), entaun ami halo fali jestaun fahe loron tolu (3) hahú abertura no akumula suku Atelari, Sagadate, Saelari, Samalari, Nunira, Libagua no Soba ita halo sentru (postu Laga vila) bazar baratu, loron rua ikus ikus (10-11 ) sei hala’o suku Tekinomata no halo enseramentu aneksu ho atividade dias nasionál 12 loron Juventude no aktividade lubuk ida ita halo suku Tekinomata,” relata Administradór Laga.
Fatin hanesan Komunidade Suku Soba Violante da Silva, sente kontente tamba sosa fós ho folin baratu inklui nesesidade báziku seluk.
“Sira mai fa’an iha ne’e (Laga vila) folin tun fós iha ne’e dolár Sanulu resin lima sira mai fa’an iha ne’e 12,50 cem, rinsu 4,00 dolár ohin ami sosa 2,50 cem ne’e ami sente di’ak,” dehan Komunidade.
Entertantu Ministeriu Komérsiu Industria liu husi diresaun Nasionál Komérsiu Internu kopera servisu ho empreza lima kompostu empreza Kretiv Furak, Roman Star, Díli Mart, W-Four no Telemor hodi fa’an nesesidade báziku hanesan foos, mina, rinso, manu tolun inklui telemovel, sim kard no nesesidade báziku seluk, maibé grupu balun husi Laga mos fa’an produtu lokál no tais.
Ekipa Kobertura : RCLM
