RCLM Baucau (27-10-2025)—Estrutura Autoridade Munsipal Baucau hamutuk lian nain hala’o atividade kultural, hodi hasa’i hikas kero no kasu promesa sira ne’ebe hatur iha resintu Administrasaun Munisipal Baucau iha tinan 2021 relasiona moras covid-19.
Sekretariu Munisipal Baucau Asuntu Planeamentu Dezenvolvimentu Integradu Eduardo Filipe Ximenes esplika, momentu liu ba (2019) moras covid-19 tama Timor-Leste autoridade konvida lian nain sira husi Postu kero iha Munisipiu no alarga ba Postu Administrativu sira, maibe agora moras covid la iha ona tamba ne’e konvida hikas lian nain, Administrador no xefe suku hasa’i hikas kero ne’ebe hatu’ur.
“Ita Timor iha kultura fi’ar ba ida ne’e sasán lulik sira uluk lian nain sira tau ka hatu’ur tenke hasa’i fila fali, uluk ita tau Instituisaun Autoridade mak husu la’ós individual ne’ebé responsavél individual la iha ita konkordansia ho Instituisaun hotu ohin ita hasa’i tiha kero ne’e, depois aban ita halo komemorasaun adezaun Timor-Leste ba asean nian,” dehan Sekretariu Munisipal Planeamentu Integrdu Dezenvolvimentu iha resintu Administrasaun.
Entertantu rezultadu husi manu no bibi aten lian hatudu rezultadu prosperu entermus kultura, tamba ne’e ba oin Autoridade Munisipal hamutuk entidades hotu sei serbisu di’ak liu tan hodi fó atendementu ba populasaun iha Munisípiu Baucau.
Hola parte iha atividade hasai hikas kero no kasu promesa ne’e, kompostu husi estrutura Munisipal, Diretor Servisu Munisipal no Delegasaun Territóriu , Polisía Nasionál Timor-Leste, Xefe Suku no Sosiedade Sivil.
Ekipa Kobertura: RCLM
