RCLM Baucau (20-10-2025)—Autoridade kestiona projeitu reabilitasaun estrada kilometro 2 iha suku Bahamori Postu Administrativu Venilale Munisipiu Baucau, tamba tinan tolu ona maibe seidauk finaliza.
Xefe suku Bahamori Estanisilão Guterres preokupa projeitu reabilitasaun estrada suku Bahamori to’o turizmu bee manas Uaikana, responsabiliza husi kompañia Jomarjo unipesoal limitada implementa lahatudu nia progresu tamba tinan tolu ona, maibe seida’uk to’o pursentu lima nolu.
Autoridade komunitariu ejije Ministeriu Obras Publika Munisipiu Baucau, fó samada atensaun ba kompañia implementador aselera servisu, nune’e projeitu referida hotu iha tempu badak.
”Estrada husi eskola to’o bee manas Uaikana kilometro 2 durante la’o 2023 to’o agora labele finaliza no lato’o tan 50% razaun saida ita lahatene,” hateten Xefe suku Bahamori ba Jornalista sira iha sentru konvensoes Baucau kinta feira (16/102025).
Kordenador Tékniku destakadu Munisipiu Baucau Diogo Caleza Correira hateten, relasiona projeitu reabilitasaun estrada iha Bahamori fo ona karta samada dala-rua ba kompañia implemetador, atu selera servisu bainhira lakumpri karta xamada sei aprezenta ba Ministeriu Obras Publiku Nasional foti desiaun hapara kontratu.
”Los duni projeitu neba(Bahamori) la’o tinan rua tolu ona tamba fator iklima, social no gestaun kompañia rasik hau fo xamada atensaun dala rua primeiru iha loron 24 jullu 2025, segundu iha loron 1 outubru tamba tuir rekezitu normal xamada dala-tolu molok ita rekomenda ba Ministeriu taka projeitu refere, ne’ebe kada xamada to’o fulan ida ita hein to’o 31 outubru se laiha asaun iha terenu bazeia karta ita haruka ita sei haruka ba Ministeriu foti desizaun,” hateten Diogo.
Entertantu MOP asina kontratu ho kompañia Jomarjo unipesoal limitada iha loron 12 outubru tinan 2022, ho durasaun tinan ida hodi halo reabilitasaun estrada iha suku Bahamori maibe tinan tolu ona nia progresu fiziku foin atinji 37,91 %. orsamentu alokadu ba projeitu ne’e hamutuk Dolar Amerikanu $ 438,463.63.
Ekipa Kobertura : RCLM
