RCLM Baucau (15-07-2025)—Komunidade suku Buibau kompostu Aldeia rua hanesan Buibau no Loidua iha postu administrativu Baucau vila Munisipiu Baucau, maória infrenta problema falta bee moos tamba seidauk hetan kanalizasaun.
Komunidade Aldeia Bulubai Anibal Freitas Ximenes hateten, tinan barak seidauk asesu infraestrutura baziku kona ba bee-moos, atu utiliza ba nesesidade kada loron la’o distansia dok foin to’o bee matan hodi kuru, maibé tempu bai loron naruk bee matan maran obrigadu tenke sosa bee husi kompañia balun ne’ebé fa’an bee.
“Ami iha ne’e aldeia rua maibé bee mak araska duni ba ami hahú Timor ukun an to’o agora ami ba bee matan kuaze kilo rua maibé bai-loron bele maran, ba han no haris ami bele aluga kareta isin ida tamba ne’e ami husu ba autoridade kompetente bele kanalizasaun bee moos,” informa komunidade iha sede suku Buibau .
Xefe Suku Buibau Francisco Ximenes rekoñese nia komunidade halerik ba bee-moos, tamba ne’e aposta proposta ba programa nasionál dezenvolvimentu suku kada tinan, maibe laiha bee matan permanente ho volume boot atu kanaliza ba komunidade.
“Suku Buibau aldeia rua eziste seidauk totalmente asesu bee-moos sira loro-loron tanki ida 12 dolár, sira laiha kbi’it ba buka bee matan Uaimori, Tanotoi no Casairate kuaze kilo 1 to’o 2 maibe tempu bai-loron menus ba dadauk laforte atu dada ba komunidade, PNDS kada tinan osan iha hela mais bee ne’e mak susar ami fura ona bee fou-foun sai mais ikus maran fila-fali,” dehan Xefe Suku Buibau
Entertantu Suku Buibau hamutuk uma-kain 600 resin no populasaun 3.000 resin, husi númeru ne’e uma-kain 100 resin asesu ona kanalizasaun bee moos husi BTL,EP, tamba hela besik área urbana Baucau vila no balun asesu husi perfursaun bee dahuluk iha suku Buibau, maibe falta uma-kain 300 resin mak seidauk hetan kanalizasaun tamba devitu bee menus.
Ekipa Kobertura : RCLM
